monumenta.ch > Hieronymus > sectio 6

Word Selection for Searching

Report an Error in this Sectio
Hieronymus, Epistulae, 3, 60, 6
Igitur ad nostra veniamus. Non plangam cum Iacob et David filios in lege morientes; sed cum Christo in Evangelio recipiam resurgentes. IUDAEORUM LUCTUS, Christianorum gaudium est. 'Ad Vesperam demorabitur fletus, et ad matutinum laetitia . Nox praecessit, dies autem appropinquavit' . Unde et Moyses moriens plangitur , Iesus absque funere et lacrymis in monte sepelitur. Quidquid de Scripturis super lamentatione dici potest, in eo libro quo Paulam Romae consolati sumus, breviter explicavimus. Nunc nobis per aliam semitam ad eumdem locum perveniendum est, ne videamur praetrita et abolita quondam calcare vestigia.